ائلمان بئی

 دوت الیمدن بو همان الدی فراقینده سنین

یادیما سالماق همان باشه چالاردیم گئجه لر

حوسن روخساریوی رؤیاده چکردیم قلمه

قلبیمی قاب ائلییب قابه سالاردیم گئجه لر

بونا خاطیر کی آدین دوشمه یه اغیار الینه

دوز کیمی آدیوی یازدیقجا یالاردیم گئجه لر

بئله سیزلاردی اورک یادینه سالدیقجا سنی

قوش کیمی یئرده دوشردیم چابالاردیم گئجه لر

بلکه سن ساغ یاشاییب  ساغ دولانیب  ساغ گزه سن

گؤزلیم هر قادان اولسایدی آلاردیم گئجه لر

سن رقیبیمله گونوز سیره چیخاردین چمنه

من ده عشقینده سولاردیم سارالاردیم گئجه لر

گؤزلرین یادیما دوشدوکجه اسردی بدنیم

سینه می دیرناق آتاردیم پارالاردیم گئجه لر

تابلو اوستونده چکردیم سنی مین زحمتی لن

بیر باخیب اوستونه تئز رنگی جالاردیم گئجه لر

ایندی ده گئتمه لی سن گئت دئمیرم من ده گلیم

قاللام اول حالدا کی اوّلده قالاردیم گئجه لر

مکتب عشقیده مجنونیله من با هم ایدیک

غم ییغاردیم سینه مه غم قالاردیم گئجه لر

مجنون اوز عشقینی لیلایه گؤره بیلدیردی

من گونوز یازدیقیم عشقی قارالاردیم گئجه لر